Kanthalloor Salai- Article

കാന്തള്ളൂർ ശാല
    °°°°°°°°°°°°°°°°°°°
ആയ്, ചേര രാജാക്കന്മാർ കേരളത്തിന്റെ വിവിധ ഭാഗങ്ങളിൽ ക്ഷേത്രങ്ങളോട് അനുബന്ധിച്ച് വേദാധ്യയനത്തിനുള്ള ശാലകൾ എന്ന വിദ്യാഭ്യാസ സ്ഥാപനങ്ങൾ സ്ഥാപിച്ചിട്ടുണ്ട്. ഇത്തരത്തിലൊന്നാണ്‌ #ദക്ഷിണനളന്ദ എന്നറിയപ്പെട്ട #കാന്തളൂർശാല. ക്രിസ്തു വർഷത്തിന് ഒൻപതും പത്തും നൂറ്റാണ്ടുകളിൽ ഇന്നത്തെ തിരുവനന്തപുരത്ത് നിലനിന്നിരുന്ന വിദ്യാഭ്യാസകേന്ദ്രമായ കാന്തളൂർ ശാല.

ആയ്, ചേര രാജാക്കന്മാർ കേരളത്തിൽ നിരവധി ക്ഷേത്രങ്ങൾ സ്ഥപിക്കുകയുണ്ടായി . ക്ഷേത്രങ്ങളോട് അനുബന്ധിച്ച് ശാലകളും. തെക്കൻ കേരളത്തിലെ കാന്തളൂർശാല, കരകണ്ടീശ്വരം ശാല, തലക്കുളംശാല, മദ്ധ്യകേരളത്തിലെ മൂഴിക്കളം ശാല എന്നിവയായിരുന്നു പ്രധാന ശാലകൾ. കാന്തളൂരിലെ ശാലയിൽ പ്രവർത്തനം ഏതുരീതിയിലായിരുന്നെന്നോ ചിട്ടകൾ എന്തൊക്കെയായിരുന്നെന്നോ നേരിട്ടു വിവരിക്കുന്ന ശാസനങ്ങളോ ഏടുകളോ ഇതുവരെ ലഭ്യമല്ല. ഒൻപതാം ശതകത്തിന്റെ പകുതിയിൽ  ആയ്‌ വംശ രാജാവായ കരുനന്തടക്കൻ സ്ഥാപിക്കപ്പെട്ട പാർത്ഥിവപുരം ശാലയെ (കന്യാകുമാരി ജില്ല- ഇന്നവിടെ പാർത്ഥിവപുരം പാർത്ഥസാരഥി ക്ഷേത്രം നിലവിലുണ്ട്) സംബന്ധിക്കുന്ന ചെപ്പേടിലാണ് കാന്തളൂർ ശാലയെ സംബന്ധിച്ച ആദ്യ പരാമർശം കാണുന്നത്. ഇതിൽ കാന്തളൂർ ചാലയിലെ “മര്യാദ” (ചട്ടം, നിയമം, ) ആണ് പാർത്ഥിവശേഖരപുരത്തും പിന്തുടരുക എന്ന് പറയുന്നു. മീമാംസ, പൌരോഹിത്യം, ത്രൈരാജ്യവ്യവഹാരം (മൂന്ന് രാജ്യങ്ങളിലെ നിയമവ്യവഹാരം) എന്നീ വിഷയങ്ങളിലെ പരീക്ഷയ്ക്ക് ശേഷമാണു വിദ്യാർത്ഥിയെ പാർത്ഥിവപുരം ശാലയിൽ പ്രവേശിപ്പിച്ചിരുന്നത്. ശാലകളിലെ അദ്ധ്യാപകർ ഭട്ടൻമാർ (പട്ടന്മാർ) എന്നും വിദ്യാർത്ഥികൾ ചട്ടർ (ചാത്തിരൻ) എന്നും അറിയപ്പെട്ടു. ശാലകളിൽ വിവിധ ശാസ്ത്രശാഖകൾ, വ്യാകരണം, തത്ത്വചിന്ത, നിയമം തുടങ്ങിയവയിലാണ്‌ അദ്ധ്യയനം നടത്തിയിരുന്നത്‌. വിദ്യാർത്ഥികൾക്ക് ശാലയിൽ ഭക്ഷണവും വസ്ത്രവും താമസവും സൗജന്യമായി നൽകിയിരുന്നു. ചട്ടന്മാർ എന്നത് ബ്രാഹ്മണവിദ്യാർത്ഥികളെ കുറിക്കുന്ന പദമായതിനാൽ ഇവിടങ്ങളിൽ ബ്രാഹ്മണവിദ്യാർത്ഥികൾക്ക് മാത്രമേ പ്രവേശനമുണ്ടായിരുന്നുള്ളൂ എന്നാണു  ചരിത്രകാരന്മാർ അനുമാനിക്കുന്നത്. ചില ശാലകളിൽ ആയുധപരിശീലനവും നൽകിയിരുന്നിരിക്കാം എന്ന് ഊഹിക്കുന്നു. എന്നാൽ അതിനു ശാസനങ്ങളിൽ നിന്ന് നേരിട്ടുള്ള രേഖാ തെളിവുകൾ ലഭ്യമല്ല.

ഒരു വിദ്യാഭ്യാസ സ്ഥാപനമായാണു ഉദയം ചെയ്തതെങ്കിലും ശാസനങ്ങളിലെ കാന്തളൂരിന്റെ പരാമർശം ഏതാണ്ടെല്ലാം തന്നെ “കലമറുപ്പിനു” ഇരയാകുന്ന സ്ഥലമെന്ന പരിഗണനയിലാണ്. #കലമറുപ്പ് ഒരു സൈനികനടപടിയാണെന്നും ഇങ്ങനെ തുടരെയുള്ള ആക്രമണങ്ങൾക്ക് കാന്തളൂർ വിധേയമാകാൻ കാരണം അവിടം ഒരു സൈനികപരിശീലനകേന്ദ്രം കൂടിയായി വികസിച്ചിരുന്നിരിക്കണം എന്നാണ് ഇതേപ്പറ്റിയുള്ള രേഖകൾ പഠിച്ച ചരിത്രകാരൻ ഇളം‌കുളം കുഞ്ഞൻപിള്ളയുടെ അഭിപ്രായം. രാജരാജൻ മുതൽ കുലോത്തുംഗൻ വരെയുള്ള ചോളരാജാക്കന്മാരും പരാന്തകപാണ്ഡ്യനുമാണു കാന്തളൂർ “കലമറുത്ത”തായി വിവിധ ശാസനങ്ങളിൽ പറയുന്നത്. കരുനന്തടക്കന്റെ കാലത്ത് വിദ്യാഭ്യാസസ്ഥപനമെന്ന നിലയിൽ പ്രസിദ്ധിയാർജ്ജിച്ച കാന്തളൂർ പത്താം ശതകത്തോടെ ആയ്‌രാജഭരണം അവസാനിക്കുമ്പോൾ തെക്കൻ തിരുവിതാങ്കൂറിലേക്ക് വ്യാപിച്ച ചേരഭരണത്തിനു കീഴിലായിട്ടുണ്ടാകണം. വർധിച്ചുവരുന്ന ചോളശക്തിയെ പ്രതിരോധിക്കാൻ കാന്തളൂരും തലക്കുളവുമടക്കമുള്ള ‘ചാല’കളിൽ ‘കലം’ വർദ്ധിപ്പിക്കുകയും സൈനികകേന്ദ്രങ്ങളായി പരിണമിക്കുകയും ചെയ്തിരിക്കാം.

കാന്തള്ളൂർ ശാലയുടെ കൃത്യമായ സ്ഥാനം എവിടെയായിരുന്നു എന്നതിനെക്കുറിച്ച് വിവിധാഭിപ്രായങ്ങൾ നിലനിൽക്കുന്നുണ്ട്. കാന്തളൂർശാല ഇന്നത്തെ തിരുവനന്തപുരം ജില്ലയിലെ നെയ്യാറ്റിൻ‌കരയിൽ നിന്നും ഏഴ് മൈൽ അകലെയുള്ള കാന്തളൂർ എന്ന ഗ്രാമത്തിലായിരുന്നു സ്ഥിതി ചെയ്തിരിക്കാൻ സാദ്ധ്യത എന്ന് തിരുവിതാങ്കൂർ പുരാവസ്തു വകുപ്പിന്റെ സൂപ്രണ്ടും ട്രാവൻ‌കൂർ ആർക്കിയോളജിക്കൽ സീരീസിന്റെ മുഖ്യസംശോധകരിലൊരാളുമായ കെ.വി സുബ്രഹ്മണ്യ അയ്യർ ഊഹിക്കുന്നു.

പദ്മനാഭസ്വാമിക്ഷേത്രത്തിനു ഒന്നര കിലോമീറ്റർ വടക്കുപടിഞ്ഞാറെ വലിയശാല തന്നെയാണ് ഇതെന്ന് ഹജൂർ ശാസനങ്ങൾ കണ്ടെടുത്തു പ്രസിദ്ധപ്പെടുത്തിയ ടി. ഗോപിനാഥറാവു പറയുന്നു. വലിയശാലയിലെ ശിവനെ കാന്തളൂർ ചാലൈ മഹാദേവൻ എന്ന് ഒമ്പതാം ശതകം മുതലുള്ള രേഖകൾ പരാമർശിക്കുന്നുണ്ട് . പതിനാലാം നൂറ്റാണ്ടിൽ എഴുതപ്പെട്ട അനന്തപുരിവർണ്ണനം എന്ന കൃതിയെ അടിസ്ഥാനമാക്കി തിരുവനന്തപുരം അങ്ങാടിക്കും(ചാല), ആര്യശാല, ചെന്തിട്ട, വലിയശാല എന്നീ ക്ഷേത്രങ്ങൾക്കും ഇടയിലാണ്‌ കാന്തളൂർശാല എന്ന് കെ. ശിവശങ്കരൻ നായർ അനുമാനിക്കുന്നു . കേസരി ബാലകൃഷ്ണപിള്ളയുടെ അഭിപ്രായം ചേന്ദമംഗലം പാലിയം കുന്നിൽ ആയിരുന്നിരിക്കണം യഥാർത്ഥ കാന്തളൂർശാല എന്നും ചോളലിഖിതങ്ങളിൽ “കലമറുത്തു” എന്നു കാണുന്ന കാന്തളൂർ കടിക പട്ടണത്തിനു സമീപമുള്ള മറ്റൊരു ശാല ആയിരുന്നിരിക്കണം എന്നുമാണ്‌. ചോളരാജാക്കന്മാർ വിഴിഞ്ഞം തുറമുഖം കീഴടക്കിയതുമായി ബന്ധപ്പെട്ടാണു ചോളശാസനങ്ങളിൽ കാന്തളൂർചാല ആവർത്തിച്ച് പ്രത്യക്ഷപ്പെടുന്നത്. വിഴിഞ്ഞത്തിനടുത്ത് കാന്തളൂർ എന്നൊരു സ്ഥലം ഉണ്ടെങ്കിലും ഒരുകാലത്ത് ഒരു പട്ടണമായിരുന്നതിന്റെ സൂചനകൾ അവിടെക്കാണാത്തതുകൊണ്ട് അതുതന്നെയാണോ പ്രസിദ്ധികേട്ട കാന്തളൂരെന്ന് ഇളംകുളം സംശയിക്കുന്നുണ്ട്. ശാസനങ്ങളിൽ എപ്പോഴും വിഴിഞ്ഞം ആക്രമിക്കുന്നതിനൊപ്പമാണ്‌ കാന്തളൂർശാലയും ആക്രമിക്കപ്പെടുന്നതായി സൂചിപ്പിക്കുന്നത്; ഇതും “തിരുവനന്തപുര”ത്തിനോട് ചേർത്ത് ഈ ശാലയെ പരാമർശിക്കാത്തതും ശ്രദ്ധേയമാണ്. വിഴിഞ്ഞത്തുതന്നെയാണു കാന്തളൂർ ശാല എന്നും അഭിപ്രായമുണ്ട്.

ശ്രീ.സുബ്രഹ്മണ്യ അയ്യർ ഹജൂർശാസനം പ്രമാണമാക്കിക്കൊണ്ട് പറയുന്നത് കരുനന്തടക്കൻ എന്ന ആയ്‌വംശരാജാവ് (ഏ.ഡി 875-885) തന്റെ ഭരണത്തിന്റെ ഒൻപതാം വർഷം #മുടാലനാട്ടിലെ പശുങ്കുളം (പചുങ്കുളം-പൈങ്കുളം) ഗ്രാമത്തിലെ ഉഴക്കുടിവിള എന്ന ഭൂഭാഗം മുഞ്ചിറൈ സഭക്കാരിൽ നിന്ന് വാങ്ങി അവിടെ ഒരു ക്ഷേത്രം നിർമ്മിച്ച് വിഷ്ണുവിനു സമർപ്പിക്കുകയും അങ്ങനെ പാർത്ഥിവശേഖരപുരം ഗ്രാമം സ്ഥാപിതമാകുകയും ചെയ്തു എന്നാണ്. ഇതേ ശാസനത്തിൽ തന്നെ കാന്തളൂരിന്റെ ചട്ടം തന്നെ പാർത്ഥിവപുരം ചാലയിലും ബാധകമാണെന്ന് പറയുന്നുണ്ട്. പാർത്ഥിവപുരം ചാലയുടെ സ്ഥാപകൻ കരുനന്തടക്കൻ തന്നെയാവാം കാന്തളൂരിന്റെ സ്ഥാപകനും എന്ന് അനുമാനിക്കപ്പെടുന്നു. ആയ്‌രാജ്യത്തെ ശാലകൾക്കെല്ലാം മാതൃക കാന്തളൂരായിരുന്നിരിക്കാം.

ആയ്, മഹോദയപുരം, വേണാട് രാജ്യങ്ങൾക്ക് നേരേ നടന്ന ആക്രമണങ്ങളെക്കുറിച്ചുള്ള ചോള ലിഖിതങ്ങളിൽ കാന്തളൂർശാലയെക്കുറിച്ച് നിരവധി പരാമർശമുണ്ട്. രാജരാജചോളൻ ഒന്നാമൻ തന്റെ ഭരണത്തിന്റെ 4-ആം വർഷത്തിൽ (ഏകദേശം  ക്രി.വ. 988) 'കാന്തളൂർശാലൈ കലമറുത്തരുളി' എന്ന് തിരുവലങ്ങാട് ശാസനത്തിലും മറ്റ് പല ചോള പ്രശസ്തിലേഖങ്ങളിലും കാണുന്നുണ്ട്. ‘കലമറുത്തു ‘ എന്നതിനു നിരവധി അർത്ഥങ്ങൾ കല്പ്പിച്ചു കാണുന്നുണ്ട്.

കാന്തളൂരിലെ കപ്പലുകൾ നശിപ്പിച്ചു എന്നാണർത്ഥമെന്നും വിദ്യാർത്ഥികൾക്കുള്ള ഭക്ഷണസൗകര്യം ഇല്ലാതെയാക്കിയെന്നും വാദമുണ്ട്. കാന്തളൂരിനെപ്പറ്റിയുള്ള ആദ്യപരാമർശം വരുന്ന പാർത്ഥിവപുരം ചെപ്പേടിൽ കാന്തളൂർ ശാലയിലെ മര്യാദ (നിയമങ്ങൾ) പാർത്ഥിവപുരത്തെ ചാലയ്ക്കും ബാധകമാണെന്ന് പറയുന്നുണ്ട്. അതു സൂചകമായി എടുത്താൽ ഒരു വിദ്യാർത്ഥിക്ക് ഒരു ദിവസം വരുന്ന ചെലവിനെ ഇത്ര നാഴി നെല്ല് എന്ന കണക്കിൽ പറയുന്നതാണു “കലം”. ഉണ്ണുന്ന പാത്രം എന്ന വ്യാഖ്യാനം സ്വീകരിച്ചാൽ ചാലയിലെ ‘കലം’ എന്നതിനു ‘സ്ഥാനം’ എന്ന് അനുമാനിക്കാം.ഇതിൻപ്രകാരം കലമറുപ്പിനു ഭക്ഷണപാത്രം,അഥവാ വിദ്യാഭ്യാസസൌകര്യം ഇല്ലാതാക്കി എന്ന് ഒരു വ്യാഖ്യാനമുണ്ട്.

കാന്തളൂരിന്റെ പ്രതാപം നശിപ്പിച്ചു എന്നാണ്‌ കേസരി ബാലകൃഷ്ണപിള്ള അനുമാനിച്ചത്.  ബ്രാഹ്മണ പണ്ഡിതരെ ചോളർ തർക്കത്തിൽ തോല്പ്പിച്ചു എന്നാണ്‌ ബർട്ടൺ സ്റ്റെയിൻ അനുമാനിക്കുന്നത്. അരുളി എന്നു ചേർത്തിരിക്കുന്നതിനാൽ അതൊരു നല്ല കാര്യം നടന്നതിന്റെ സൂചനയാകും എന്നു വാദിച്ച് ദേശി വിനായകം പിള്ള കാന്തളൂരിലെ വിദ്യാർത്ഥികൾക്കുള്ള ഭക്ഷണസമ്പ്രദായം ക്രമീകരിച്ചു എന്നാണ്‌ കലമറുത്തു എന്നതുകൊണ്ട് അർത്ഥമാക്കാവുന്നത് എന്ന് അനുമാനിച്ചു.

ഇളംകുളം കുഞ്ഞൻ പിള്ള കലമറുപ്പ് ഒരു സൈനിക നടപടി തന്നെയാണെന്നാണ്‌ നിരീക്ഷിക്കുന്നത് എന്നാൽ കപ്പൽ നശിപ്പിച്ചു എന്നതിനോട് യോജിക്കുന്നുമില്ല  രാജേന്ദ്രചോളൻ ഒന്നാമൻ ക്രിസ്തുവർഷം 1019- ആണ്ടിൽ കാന്തളൂർ ശാലയും വിഴിഞ്ഞവും കീഴടക്കുകയും വിഴിഞ്ഞത്തിനു #രാജേന്ദ്രചോഴപ്പട്ടണമെന്ന് പുനർനാമകരണം നടത്തുകയും ചെയ്തു. ഏ.ഡി 1046 ലെ മണിമംഗല ശാസനമനുകരിച്ച് രാജാധിരാജ ചോളൻ വേണാട് രാജാവിനെ വധിച്ച് കാന്തളൂർ കീഴടക്കുകയുണ്ടായി.കുലോത്തുംഗചോളനും കാന്തളൂർ ആക്രമിച്ചിട്ടുള്ളതായി അനുമാനിക്കുന്നു.

ജൈന സന്യാസി #ഉദ്യോതനസൂരിയുടെ #കുവലയമാലയിൽ നായകൻ വിജയപുരം എന്നൊരു ശാലയിൽ എത്തിയെന്നും പള്ളിപ്പതിയുടെ അതിഥി ആയി എന്നും പറയുന്നു,അവിടെ വേദം, തർക്കം, വ്യാകരണം, ആയോധനവിദ്യകൾ മുതലായവ അഭ്യസിക്കുന്നുണ്ടെന്നും പരാമർശമുണ്ട്. വിജയപുരം എന്നത് കാന്തളൂർശാല തന്നെയാണെന്ന് പലർക്കും അഭിപ്രായമുണ്ട്.  പതിന്നാലാം നൂറ്റാണ്ടിൽ രചിക്കപ്പെട്ടത് എന്ന് വിശ്വസിക്കപ്പെടുന്ന #അനന്തപുരിവർണ്ണനത്തിൽ തിരുവനന്തപുരം അങ്ങാടിയുടെ കിഴക്കേയറ്റത്ത്
“കാന്തിയും ചെൽ‌വവും മിക്ക
കാന്തളൂർചാല കാണലാം
മൂന്റു കോയിലും എൻ
മുന്നിൽ തോന്റും
തത്ര മഠങ്ങളും”
        എന്ന് പരാമർശിക്കുന്നുണ്ട്.

മുപ്പതോളം രേഖകളിൽ കാന്തളൂർശാല പരാമർശിക്കപ്പെട്ടിട്ടുണ്ട് .തിരുനന്തിക്കര, ഇരണിയൽ, ശുചീന്ദ്രം, കന്യാകുമാരി തുടങ്ങിയ പ്രദേശങ്ങളിൽ നിന്ന് രാജരാജ ചോളൻ ഒന്നാമന്റെ നിരവധി ശാസനങ്ങൾ കണ്ടെത്തിയിട്ടുണ്ട്, ഇവയിൽ പത്താം ഭരണവർഷ കാലത്ത് എഴുതപ്പെട്ടവയിൽ പലതിലും കാന്തളൂർ ശാല കലമറുത്തതായി പരാമർശമുണ്ട്.

കരുനന്തടക്കന്റെ (എ.ഡി 857-885) ഭരണത്തെ സൂചിപ്പിക്കുന്ന പാർത്ഥിവപുരം ചെപ്പേടിൽ  പറയുന്നത്

“ “ഇന്നാളാൽ മുടാലനാട്ടുപ്പചുങ്കുളത്തുപ്പടുനിലത്തിൽ മുഞ്ചിറൈച്ചവൈയാരുടൈയ ഉഴക്കുടിവിളൈ എന്നു നിലം ഇവകളുക്ക് അടിക്കടി നിലം കുടുത്ത് മാറിക്കൊണ്ട് ഇന്നിലം പിടിച്ചൂഴ്ന്ത് ശ്രീകോയിൽ എടുത്തു വിഷ്ണുഭട്ടാരകരൈ പ്രതിഷ്ഠൈ ചെയ്തു പാർത്ഥിവശേഖരപുരം എന്റു പേർ‌ ഇട്ടു കാന്തളൂർ മരിയാദിയാൽ തൊണ്ണൂറ്റു ഐവർ ചട്ടർക്കു ചാലൈയുഞ്ചെയ്താൻ ശ്രീ കോക്കരുനന്തടക്കൻ... എന്നാണ്

തിരുവലങ്ങാട്ട് ലിഖിതത്തിന്റെ ആരംഭ ഭാഗത്ത് രാജരാജ ചോളൻ ഒന്നാമൻ "കാന്തളൂർ ശാലൈ കലമറുത്തു" എന്നും കാണുന്നു

#മതിലകം ഗ്രന്ഥവരിയിൽ കീഴ്പേരൂർ ചിരി വീരമാർത്താണ്ട വർമ്മർ മൂത്തതിരുവടിയിരുന്നരുളിയേടം തെക്കിൻ കോപുരത്തിങ്കൽ കൊളത്തൂർ വീട്ടിൽ കോയിക്കലായി എഴുന്നരുളി ഇരുന്നരുളു ചിരീ താമോതരാമിറുത പിഴാര തിരുവടി ഇരുന്നരുളിയേടം കാന്തളൂർചാലൈയിൽ എഴുന്നരുളി ഇരുന്നരുളിയേടത്ത്
എന്നു കാണുന്നു .

#കടപ്പാട്-
ഇളംകുളം കുഞ്ഞൻ പിള്ള - പാർത്ഥിവപുരം ചെപ്പേട് (അഥവാ പാർത്ഥിവപുരം പട്ടയം)
#sreekumarsree.
pic  - Parthivapuram parthasaradhi temple.