ENTE BHRANTHUKAL (എന്റെ ഭ്രാന്തുകൾ)

#സീറോടോളറൻസ് ...... (zero tolerance) വീണ്ടും വീണ്ടും കോൺസന്ട്രേഷൻ ക്യാമ്പുകൾ... കുഞ്ഞുങ്ങളുടെ വായിൽനിന്ന് നിറമുലക്കണ്ണുകൾ  തട്ടിമാറ്റുന്ന നവപൈശാചിക സംവിധാനം.. പതിനായിരത്തോളം പറക്കമുറ്റാത്ത കുരുന്നുകൾ.. അഭയാർത്ഥി കുറ്റവാളികളത്രെ....    ഗർഭപാത്രത്തിൽ ജനിച്ച്  മുലകുടിച്ചുവളർന്നവന് ചെയ്യാനാകുന്നുവല്ലോ കുരുന്നുകളോട് ഈ ക്രൂരത... ("ഓരോ ശിശുരോദനത്തിലും കേൾപ്പുഞാൻ ഒരുകോടി ഈശ്വരവിലാപം.... ഓരോ കരിന്തിരിക്കണ്ണിലും കാണ്മുഞാൻ ഒരുകോടി ദേവനൈരാശ്യം"-മധുസൂദനൻ നായർ) ....... #ശ്രീ

വായില്ലാക്കുന്നിലപ്പൻമാർ വിശപ്പ്... ഉപേക്ഷിച്ച ഒരുനേരത്തെ ആഹാരത്തിന്റെ ഓർമ്മയാണത്.. നാലാമത്തെ പീരിയേഡിൽ വായുവിൽ പരക്കുന്ന ഉച്ചക്കഞ്ഞിയുടെ ഗന്ധം..... ഉളളിലുയരുന്ന വിശപ്പിന്റെ ഗന്ധവുമായി ഇണചേരുന്ന പരിസമാപ്തിയിലാണ് പ്ലാവിലക്കുമ്പിളും ചുണ്ടും തീർക്കുന്ന സീൽക്കാരമുണരുന്നത്. എന്നുമാർക്കും പ്രാർത്ഥനയാണത്, ഈശ്വരനും ഭക്ഷണവും....!! അവസരവാദിയായ ഭഗവാന്‍  അത്താഴപട്ടിണിക്കാരനു തണലേകുമെന്ന് പറഞ്ഞതാരാണ്..? ജനാധിപത്യം  ദാരിദ്ര്യം തുടച്ചെറിയുമെന്ന് ഉദ്ഘോഷിച്ചവനുമാരാണ്..? എനിക്കറിയാമിപ്പോൾ, കാക്കകാഷ്ഠങ്ങളിലഭിഷേകമാടി പാതയോരങ്ങളിൽ വിശ്രമിക്കയാണവർ. അഭിപ്രായങ്ങൾ പ്രസവിച്ച ഇരുമ്പുലക്കകളുരുക്കാൻ ആലകളില്ലാത്തവർ, ആലയങ്ങളുമില്ലാത്തവർ... വിശക്കാതിരിക്കാൻ ആമാശയങ്ങളിലാരോ കോൺക്രീറ്റ് നിറയ്ക്കപ്പെട്ടവരാണവർ. വായകൾക്കുപകരമവിടെ വരകളവശേഷിപ്പിച്ചവർ. വായില്ലാക്കുന്നിലപ്പന്മാർ.         #ശ്രീകുമാർശ്രീ ധ്വനി ബുക്സ് പ്രസിദ്ധീകരിച്ച കാലത്തോട് കലഹിക്കുന്ന കവിതകൾ എന്ന പുസ്തകത്തിൽ നിന്നും

വഴുതിയകലുന്ന അവസാന നിമിഷവും ആഗ്രഹങ്ങൾ അങ്ങിനെതന്നെ മനസ്സിലവശേഷിക്കും പ്രാപ്തമല്ലെന്നുറപ്പാകുമ്പോഴും മനസ്സിൽ നിന്നതൊഴിയാറേയില്ല..

ഒറ്റമുറിവീട് കുന്നിൻമുകളിലെ ഒറ്റമുറിവീടു കണ്ടിട്ടുണ്ടോ... ആഗമന നിർഗ്ഗമന മാർഗ്ഗങ്ങളില്ലാത്ത ഒറ്റമുറിവീട്.. മേൽക്കൂര പണിയാൻ മറന്നുപോയതാണതിൽ.. ചുവരുകൾ പ്രതിധ്വനികളെ പ്രതിരോധിക്കുന്ന വീട്.. കുത്തനെ വീശുന്ന ചെറു കാറ്റാണതിനുള്ളിൽ. കത്തിക്കാളുന്ന ജഢരാഗ്നിപെറ്റ നേർത്ത ഞരക്കങ്ങളുയരുന്ന വീട്. പിൻകഴുത്തിൽ ഉന്നംതെറ്റാതെറിഞ്ഞ് പാരമ്പര്യപ്പെരുമ തീർത്തവരുടെ, തച്ചുവിദ്യയാണതിന്റെ വാസ്തു. സംവേദനങ്ങളെല്ലാം മഴയോടും വെയിലിനോടും നിലാവിനോടും മാത്രം. ഈ വീടെനിക്കു തീറെഴുതിയവർ വടക്കൊരു തർക്കത്തിലാണിപ്പോഴും.. ഉദിച്ചുണർന്നത് സൂര്യനോ നക്ഷത്രമോ എന്ന തർക്കം.   #ശ്രീ . കവിത ധ്വനി ബുക്സ് പ്രസിദ്ധീകരിച്ചതാണ്.

കാവ്യമുകുളങ്ങൾ എന്ന കവിതാസമാഹാരത്തിൽ പ്രസിദ്ധീകരിച്ച എന്റെ #തുലാമഴ എന്ന കവിതയും ശ്രീമതി ഉമാദേവിയുടെ ആസ്വാദനവും.. #തുലാമഴ തുലാമഴ.... മധുരമായെന്തോ മൊഴിയുകയാണ്... സുഖദദായിനിയായ്.... ജാലകപ്പുറത്തെ കാഴ്ചമറച്ച്, നിദ്രയ്ക്ക് നിശ കൂട്ടുവിളിക്കുന്നു. ഉടലുമുയിരുമലിഞ്ഞൊരുറക്കത്തിന്.. ശുഭരാത്രിയോതാൻ മറന്നുമറഞ്ഞു, മഴപ്പാട്ടിന് താളം പിടിച്ചൊരുസന്ധ്യ. മച്ചിലൂടെ ചോർന്നൊഴുകുന്നൊരു പുഴ ഓട്ടുകിണ്ടിയിലപശ്രുതി തീർക്കുന്നു.. മഴയ്ക്കൊപ്പം വേഴ്ചകഴിഞ്ഞ്, ജാലകപ്പഴുതിലൂടെത്തി നനുത്ത ചുംബനബാക്കി പകർന്ന കാറ്റിന്റെ ചുണ്ടിലൊത്തിരി നനവ്.. കൂർത്ത ചില്ലയിലൊന്നിൽ ചിറകുപൂട്ടിയ രാക്കിളിപ്പാട്ട് ഹൃദയതന്ത്രിയിലരുമയായ് ഒറ്റക്കമ്പിമീട്ടിയൊരുതാളമിടുന്നു. മിഴിത്തുമ്പിലേറിയൊരാകുലഭാവം ഈറനേറിവന്ന കൈവിരൽ മായ്ക്കുന്നു ഗാഢാലിംഗനങ്ങളിൽ  ആപാദം- പിറക്കുന്നതഗ്നിസ്ഫുലിംഗങ്ങൾ മഴ തകർത്തെറിയുകയാണ്, ആകുലതകളുമാശങ്കകളും. മഴ കോർത്തെടുക്കുകയാണ്, പ്രണയവും പ്രണയദാഹവും. മഴ കോരിച്ചൊരിയുകയാണ്, ഇരുഹൃദയങ്ങളിലേക്കമൃതരേണു. മഴ ഇരുവർക്കുമായൊരു മറതീർക്കുകയാണ്, തണുത്ത കമ്പളത്താൽ. മഴ മധുരമായെന്തോ..... മൊഴിയാതിരിക്കുവാൻ ചൂടാറ

(ധ്വനി ബുക്സ് "കാലത്തോട് കലഹിക്കുന്ന കവിതകൾ "എന്ന കാവ്യസമാഹാരത്തിൽ പ്രസിദ്ധീകരിച്ച എന്റെ  കവിത.)                 #മക്കളെന്നറിയപ്പെടുന്നവർ മാതാപിതാക്കൾ..! ചിലർക്കാ മനോഹരപദങ്ങൾ അഗതിമന്ദിരത്തിൽ സൂക്ഷിക്കാനാണിഷ്ടം.. ചിലരെന്നോ, എപ്പോഴോ ആ പദങ്ങളെ മറന്നിരിക്കുന്നു. മറ്റുചിലർ, ആ  അക്ഷരക്കൂട്ടം  അറിയാതെ പുരപ്പുറത്തുനിന്നും താഴേക്കിടും..! പിന്നെയാറക്ഷരം ചേർത്ത്ചില്ലുകൂടലങ്കരിക്കും...! അവരെയെല്ലാം മക്കളെന്നോ മരുമക്കളെന്നോ ആണറിയപ്പെടുന്നത്. ചിലരാപദങ്ങളെ മാറോടടക്കിപ്പിടിക്കും ശൈശവത്തിലേറ്റ താരാട്ട് തിരികെ നൽകും ചുളിവുകളിൽ സാന്ത്വനത്തിന്റെ സുഗന്ധതൈലം തേയ്ക്കും നരകളിൽ ചെറുമക്കളുടെ കരിമിഴിയുടെ നിറംതേയ്ക്കും.. നഷ്ടമാകുന്ന ഓർമ്മകളുടെ നേരറകളിലേക്കെപ്പോഴും നാട്ടുമാമ്പഴപ്പുളിശ്ശേരിചേർത്ത തൂശനിലയിലെ പുന്നല്ലരിചോറിന്റെ നറുഗന്ധം നിറയ്ക്കും.. അവരെ മകനെന്നോ മകളെന്നോ ആണറിയപ്പെടുന്നത്...       #ശ്രീകുമാർശ്രീ

മെറീനാബീച്ചിലെ ഒരു സന്ധ്യ. അറിയാമോ.. ഇത് K.R RENGAMMA.. #രസതന്ത്രം, #രാവണപ്രഭു തുടങ്ങിയ പല മലയാളം തമിഴ്  ഹിറ്റ് ചിത്രങ്ങളിലുമൊക്കെ ശ്രദ്ധേയമായ ചെറിയ വേഷങ്ങൾ ചെയ്തിട്ടുണ്ട്...  താരപ്രഭയുടെ ചുറ്റിലുമുള്ള  മഞ്ഞവെളിച്ചമണഞ്ഞാൽ ജീവിക്കാൻ നെട്ടോട്ടമോടുന്നു ഇത്തരം എക്സ്ട്രാ ആർട്ടിസ്റ്റുകൾ.....