ഒറ്റമരത്തിലെ പരാഗണങ്ങൾ

മരുഭൂവിലെ

ഒറ്റമരങ്ങളിലെ പൂക്കൾ,

പരാഗണവിധേയരല്ല...

വനാന്തരങ്ങളിൽ പരാഗരേണുക്കൾ

കൈമാറുന്ന കാറ്റുകൾ

ഇവയെ കാണാറില്ല;

അവയോട് മിണ്ടാറില്ല....

അവ തങ്ങളുടെ ഗന്ധങ്ങൾ

സ്വയം ശ്വസിക്കുന്നു

അവയുടെ സ്വപ്നങ്ങളിൽ

രേണുക്കൾ പൂക്കൾ തേടി

ആകാശസീമകളിൽ പറക്കുന്നു..

മഴപെയ്യാത്ത ആകാശം പോലെ,

വാക്കുകളില്ലാത്ത വാക്യംപോലെ

ഇവയുടെ കാത്തിരിപ്പുകൾ...,

ഒരു തൂമഞ്ഞു പോലും

അവയുടെ ഓർമ്മപാത്രത്തിൽ

പൊഴിഞ്ഞിട്ടില്ല... എങ്കിലും

പറയാതെ ഒഴിയുന്നൊരു

ഈ ഒറ്റനിലാവിൻ നെഞ്ചിൽ

ഇവ ഇപ്പോഴും വിടരുന്നു

പരാഗമില്ലാതെ...

പരപരാഗണവുമില്ലാത്ത

അർദ്ധപുഷ്പങ്ങളായി.

Sree.23.05.2025.

 ©️is reserved