Poem - Malayalam

ഋതുഭേദങ്ങളിലെ ഞങ്ങൾ

*തുലാസന്ധ്യയിലെ മഴ*

നിറസന്ധ്യകളിൽ നിനക്കല്പം തോർന്നുകൂടെ..?
ഈറൻ  മുടിക്കെട്ടുമായി ചെരാതിലെ ദീപം, തുളസ്സിത്തറയിലേക്ക് പകരുന്നവളോടൊപ്പം
ഞാനൊന്ന്  പ്രാർത്ഥിച്ചോട്ടെ...

*എരിവേനലിലെ കാറ്റ്*

തീച്ചൂടിൽ നിനക്കല്പം കുളിർ പകർന്നൂടെ..?
പുഞ്ചപ്പാടത്തെ കരിമുഖിയുടെ
പിൻകഴുത്തിൽ
ഞാറ്റുവേലയുടെ ഇടനേരത്ത്,
ഞാനൊന്ന്  ചുംബിച്ചോട്ടെ.

*ആതിര രാവിന്റെ തണുപ്പ്*

ഈറൻ മാറിയിട്ടും പാതിരാവിൽ
നീയിത്ര തണുപ്പിക്കുന്നതെന്തിനാണ്.. ?
ആതിരപ്പാട്ടിന്റെ  താളം മുറിയാതെ-
ആടിക്കുഴഞ്ഞവൾക്ക്,
ഞാനൽപം ചൂട് പകരട്ടെ.

           ഞാൻ
മുഖപുസ്തകങ്ങളിലൂടെ
ബ്ലോഗെഴുത്തുകളിലൂടെ
ഇരവുപകലുകളിലെ,
ഒഴിവുസമയങ്ങളുടെ
ഓട്ടയടച്ചു..

         അവൾ
അടുക്കളയൊഴിവിൽ,
സീരിയൽ നായികയുടെ
ഒരിക്കലും നിലയ്ക്കാത്ത
പുളിച്ച കണ്ണീരൊപ്പി..

ഇരുവർക്കുമിടയിലെവിടെയോ
നിറസന്ധ്യകൾ,
വേനൽത്തുമ്പികൾ,
ആതിരക്കുളിരുകൾ,
വന്നും പോയുമിരുന്നു.
ഇടനേരത്തെ പരസ്യ-
സംപ്രേഷണം പോലെ.
                      Sreekumar sree.24/03/2016.