വേഷപ്പകർച്ച

​വേട്ടയാടുന്നവന്റെ കണ്ണിലെ തീയാണെനിക്ക്,

അവൻ തൊടുക്കുന്ന അമ്പിന്റെ കൂർപ്പാണ് ഞാൻ.

വീഴുന്ന ഇരയുടെ ദയനീയശബ്ദം

അതെന്റെ സിരകളിൽ പടർത്തുന്നതാവേശം!

​കുതിച്ചു പായും വേട്ടതൻ ലഹരിയിൽ,

അട്ടഹസിക്കുന്ന വേട്ടക്കാരന്റെ പക്ഷം ഞാൻ.

ഇര പ്രാണൻ പിടഞ്ഞു വീഴുമ്പോൾ,

മെല്ലെ മാറുന്നു ഞാൻ, 

ഒരു പക്ഷപ്പകർച്ച!

​പിടയുന്ന ഇരയെ ഞാൻ മാറോട് ചേർക്കുന്നു,

കൊന്നവന്റെ ക്രൂരതയിൽ ഞാനും കരയുന്നു.

കപടമല്ല കണ്ണുനീർ, അറിഞ്ഞുതന്നെയീ വേഷം

വേട്ടയാടി തീർത്തവന്റെ ആത്മസംതൃപ്തിയെ

ഒളികണ്ണാലുഴിയുന്നുഞാൻ!.

​കഴുത്തറുത്ത കത്തിയിൽ ചുംബിച്ചു കൊണ്ട്,

മുറിവേറ്റവന്റെ നോവിനെ പുകഴ്ത്തുന്നു.

വേട്ടക്കാരനൊപ്പം ഇരയെ പിടിച്ച ഞാൻ,

ഇരയോടൊപ്പം ചേർന്ന് വേട്ടയെ ശപിക്കുന്നു!