ENTE BHRANTHUKAL (എന്റെ ഭ്രാന്തുകൾ)

....അരകല്ലും ചില്ലറ ചിന്തകളും.... °•°•°•°•°•°•°•°•°•°•°•°•°•°•°•°•°•°•° നാട്ടിലെത്തിയാൽ മകളുടെ  സന്തോഷങ്ങൾ ഇതൊക്കെയാണ്.. മിക്സി പ്രൌഡിയോടെ വന്നെങ്കിലും തീരെ ഒഴിവാക്കാതെ അരകല്ലിന് ഇപ്പോഴും മുഖ്യസ്ഥാനം തന്നെയുണ്ട്... കിണറ്റുവക്കിലെ തൊട്ടിയും കയറും ... ഉരക്കളത്തിലെ ഉരൽ..  വിറകടുപ്പ്.. എല്ലാം കാലങ്ങളായി അവർക്കനുവദിച്ച ഇടങ്ങളിൽതന്നെയുണ്ട്.. ഒരുനായ,  ഒരാൾ വന്നുകയറി ഒരുകുടുംബമായി പരിണമിക്കുന്ന  പൂച്ചകൾ,  പൗരമുഖ്യനായി അങ്കവാലും തലയെടുപ്പുമുള്ള, പ്രഭാതം വിളിച്ചോതുന്ന ഒരു പൂവനടങ്ങുന്ന കുറച്ചുകോഴികൾ.. മുൻവാതിലിന് സമീപം ചെറിയകൂട്ടിൽ സദാ ചിലയ്ക്കുന്നൊരു തത്ത... തൊഴുത്തിൽ അകിടുനിറഞ്ഞുതൂങ്ങിയൊരു അമ്മപ്പശുവും കുറുമ്പനായൊരു കിടാവും... ഇതെല്ലാം  മലയാളികളുടെ വീട് എന്ന സമ്പ്രദായത്തിന്റെ ഒഴിവാക്കാനാകാത്ത സംഗതികളായിരുന്നു...  ഇന്നലെകളുടെ നന്മകളായിരുന്നവ. മനുഷ്യൻ അണുകുടുംബമായി പരിണമിച്ചതിനോടൊപ്പം അവന്റെ ചുറ്റുപാടുകളും സമൂലപരിവർത്തനം ചെയ്യപ്പെട്ടു... വീടിനുചുറ്റും കാവലായി മറ്റുള്ളവരെ പാലനംചെയ്ത് ഓടിനടന്ന നായ് പരിപാലനം ഏറെ ആവശ്യമായ പട്ടുമെത്തയിലെ അലങ്കാരജീവിയായിമാറി... പൂച്ചകൾ ആളൊഴിഞ്ഞ പ്രദേശങ്ങളി

         ....സ്നേഹം... അധരങ്ങൾ, തുടിക്കുന്നതെന്തിനാണ് കവിൾത്തടങ്ങൾ ചോപ്പണിയുവതെന്തിനാണ്.. വിതുമ്പുവാനോ.. വിടചൊല്ലുവാനോ.. ശാപവചനങ്ങൾ ചൊരിയുവാനോ.. വരുംദിനത്തിലെന്നാശ്വസിക്കാനോ.. എന്തിനായാലും എന്റെ പ്രിയേ.. നിന്നിലൊരുവാക്കും വിടരുംമുന്പേ ഞാനവയിലൊരു ചുംബനമുദ്ര ചാർത്തുന്നു. പുലർവേളയ്ക്ക് ഞാനർപ്പിച്ച ആദ്യചുംബനത്തിന്റെ അതേ തീവ്രതയിൽ. കാരണം നീ  പിരിഞ്ഞുപോകുമ്പോഴും എന്റെ പ്രിയസന്ധ്യേ... പ്രഭാതത്തിലെന്നപോലെ ഞാൻ നിന്നെമാത്രം സ്നേഹിക്കുന്നു.                            ശ്രീ. 7/7/17.

#ഉറുമ്പുകഞ്ഞി. ചോറടപ്പിൽ വെന്തുചത്ത ചോണനുറുമ്പുകൾ...! അഗ്നിയാളുന്നതിനു മുന്പേ ചത്തുപോകുമെന്നോർത്തിരുന്നില്ല മിച്ചമാമെച്ചിൽ നക്കിമയങ്ങിയി- ട്ടൊട്ടുമോർത്തില്ല പാത്രംതിളച്ചതും. വക്കുതേടിയങ്ങോടിയനേരത്ത് ചുട്ടുപൊള്ളിമരിക്കുകയായിപോൽ. ചത്ത പ്രാണൻ പയർമണിപോലവേ ചട്ടകൂടി വറുത്തെടുത്തെന്നപോൽ വെന്തകഞ്ഞിക്കു കൂട്ടായ് കിടന്നുപോൽ വെന്തപള്ളയിലന്തിക്കു ചേർന്നുപോൽ..          #ശ്രീ

മറന്നുപോയവ ``````````````````````` കണ്ടുവോ നിങ്ങൾ രാജമല്ലിപ്പൂക്കൾ ചെണ്ടുലച്ചു വിരിച്ച പൂവീഥികൾ, രണ്ടിണപ്പൂക്കൾ പോലെന്റെ ബാല്യവും കൗതുകവും പദംവച്ച പാതകൾ. കേട്ടുവോ നിങ്ങൾ ശാരികപൈതലിൻ പാട്ടിനൊപ്പമെൻ കുഞ്ഞിളംചുണ്ടുകൾ, പേർത്തുചൊല്ലിയ പാട്ടുകൾ പാടല, ചേലുണർത്തിയ നാടിന്റെ ശീലുകൾ. തൊട്ടുണർത്തിയോ നിങ്ങളെൻ മാനസം ഞെട്ടടർത്തിയോരാ- മ്പലാൽ ലോലമായ് ചേർത്തൊരാകുലഭാവമെൻ കണ്ണിലെ നെയ്ത്തിരിക്കതിർ കണ്ടതോർക്കുന്നുവോ. ഓർക്കുമോ നിങ്ങളോർമ്മകൾ പൂക്കുന്ന നാട്ടുമാമ്പൂമണവും ചെറുമഴച്ചാറ്റിൽ - മണ്ണിൻ സുഗന്ധവും മേളമായ് , ചേർത്തുനൽകിയ പുത്തൻ നറുമണം. ഓർമ്മകൾ കൂട്ടിവച്ചവരാണെങ്കിലോർ- ത്തെടുക്കുവാനാവതുമുണ്ടെങ്കിൽ ചൊല്ലുകെന്നോടെനിക്കെന്റെ ബാല്യവും കുഞ്ഞുമോഹവും പോയതന്നെങ്ങിനെ..?         ശ്രീ.