ENTE BHRANTHUKAL (എന്റെ ഭ്രാന്തുകൾ)

    വഴിമറന്ന സന്ദേശങ്ങൾ നിദ്ര നിശബ്ദതയെ പ്രണയിക്കുന്നേരം.... നിശ ഇരുവർക്കുമായൊരു പുൽപ്പായ വിരിക്കുന്നു. മന്ദമാരുതൻ രാമച്ചക്കാടുവിട്ട് അലസമണയുന്നുണ്ട്, ചുണ്ടിൽ മുളങ്കാടിൽ നിന്ന് കട്ടെടുത്തൊരു മൂളിപ്പാട്ടുമായ്. ഒളിനയനങ്ങളൊഴിവാക്കി പനിമതിയകലെ, കരിമേഘപുതപ്പുചുറ്റി...! പരസ്പരം പായിക്കുന്ന വായുദൂതുകളിലൂടെ നമ്മുടെ ശുഭരാത്രി സന്ദേശങ്ങളിപ്പോൾ വഴിതെറ്റിയലയുകയാവും. എന്നിലേക്കും നിന്നിലേക്കുമണയാതെ. സ്വീകർത്താവിലും പ്രക്ഷിതനിലേക്കുമുള്ള വഴിതെറ്റിയലയുകയാവും തീർച്ച, അല്ലായിരുന്നെങ്കിൽ എന്റെ നെടുവീർപ്പുകളെല്ലാം ഈ തണുത്തരാവിലെങ്കിലും നീയറിയുമായിരുന്നല്ലോ.         #ശ്രീ

ഇനി വലിയകളികൾ_മാത്രം ആർത്തവരക്തമൊപ്പുന്ന പ്ലാസ്റ്റിക്പാഡുകളുടെ പരസ്യകോലാഹലങ്ങൾക്കിടയിൽ. മിന്നിമറയുന്ന കോമാളിജീവിതങ്ങൾ, സീരിയൽ കേമത്തരങ്ങൾ... കോമഡിപ്രയോഗങ്ങൾ.... വില്ലനും നായകനും കോമാളിവേഷത്തിനും ചായമിടുന്നതൊരേമുഖം.. വിഡ്ഢിവേഷപ്പടയാടിയൊരു വിഡ്ഢിപ്പെട്ടി നിറയ്ക്കുന്നു. ബാത്ത്റൂം ക്ലീനിങ്ങിന്റെ തത്ത്വശാസ്ത്രം.. താരനകറ്റുന്ന താരപ്രഭ ഒരുരൂപയുടെ വിസ്മയം കാട്ടാൻ പത്തുകോടിയുടെ വിശ്വരൂപം കോൾമയിൽക്കൊള്ളിക്കും കോലാഹലം..! പത്തുരൂപയുടെ മാജിക്കിൽ മനുഷ്യനെ ഒന്നിനും കൊള്ളാത്തതാക്കുന്ന തൃസന്ധ്യബഹളം.. വിഡ്ഢിപ്പെട്ടി.. മൂലയിലിരുന്നാളെ വിഴുങ്ങുന്ന മൂദേവീ വിസ്മയം.      #ശ്രീ...

യാത്രപോകാത്തവർ ```````````````````````````````` പാതകൾ..., സർപ്പങ്ങളാണ് പിന്നറ്റം കെട്ടിവലിച്ച മണ്ണിരകൾപോലവ നീണ്ടുനീണ്ടുപോകുന്നു. കടമെടുത്ത പ്രതലങ്ങളിൽ ചത്തുമലച്ചുകിടക്കുമത്. നെടുകെയും കുറുകെയും പഥികരെ ചുമക്കുകയാണത്.. വിയർത്തും തണുത്തും നീണ്ട നിശ്വാസങ്ങളുടെ ആലസ്യംപൂണ്ടുറങ്ങുന്നവ. യാത്രയ്ക്കു കൂട്ടാക്കാതെ നിത്യം നിശ്ചലവുമാണത്. നിശ്ശബ്ദവും നീണ്ടുനിവർന്നതുമായൊരു സത്യം. പാതകൾ.... "യാത്രപോകാതെ"- ദേശങ്ങളിൽനിന്നു ദേശങ്ങൾ താണ്ടുന്നവർ.           #ശ്രീ.

പറക്കാൻ ചിറകുകൾ ഇല്ലെങ്കിൽ വ്യവസ്ഥിതികളിൽ നിന്ന് ആകാവുന്നവിധത്തിൽ കുതിച്ചു ചാടാൻ മോഹിക്കാറുണ്ട് മനസ്സ്.  അത് പറക്കലെന്ന് വ്യാഖ്യാനിക്കേണ്ടതില്ല.. പ്രതിഷേധങ്ങൾക്ക് കരുത്തുപോരാതെ വരുമ്പോൾ ഒഴിഞ്ഞുമാറലാണ്...    #ശ്രീ.